أنت غير مسجل في منتديات مبدعون . للتسجيل الرجاء إضغط هنـا
,._.::( إعلانات مبدعون )::._.,

قال الله تعالى: { مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ } سورة ق الآية 18

.::إهداءات المبدعين::.


آخر 10 مشاركات اللوتري لامريكا2010 بدأ شرح طريقة التقديم ( آخر مشاركة : - )    <->    الخرطوم تغلق المراكز الثقافية الايرانية ( آخر مشاركة : - )    <->    مكتبة اغــاني فرقة سودانيز باند ( آخر مشاركة : - )    <->    مكتبة اغانى البلبل &amp;quot;سامــي الــمــغــربــي&amp;quot; ( آخر مشاركة : - )    <->    العلاء بن الحضرمى صحابى يمشى على الماء ( آخر مشاركة : - )    <->    لماذا نطوف حول الكعبة ( آخر مشاركة : - )    <->    غير مسجل هل يمنح الإسلام الحرية للمسيحين الذين فى بلاد المسلمين ( آخر مشاركة : - )    <->    افتعل الشوق شوقا ؟؟ الفاتح الدخيرى ( آخر مشاركة : - )    <->    مكتبة الفنان الراحل عبدالمنعم الخالدي ( آخر مشاركة : - )    <->    حبيبتى ويلى ؟؟؟؟ الفاتح الدخيرى ( آخر مشاركة : - )    <->   
مختارات    <->   المتسلق الجيد يركز على هدفه ولا ينظر إلى الأسفل، حيث المخاطر التي تشتت الذهن    <->   
الصفحات الإضافية البث المباشر قناة النيل الازرق   <->   البث المباشر تلفزيون السودان   <->   قناة الشروق - البث المباشر   <->   قناة طيبة الفضائية - البث المباشر   <->   نتيجة إمتحانات الشهادة الثانوية للعام 2012   <->   اذاعة الخرطوم - البث الحي والمباشر للإذاعة
العودة   منتديات مبدعون > :: منبر مبدعون للكتّاب والأدباء :: > | مكتبتي | > الشاعر/ عثمان احمد سعيد

الملاحظات

إضافة رد
قديم 01-08-2010, 09:54 PM   #1
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 أنا سوداني



أنا سوداني

منو الفينا يفخر
بانو انحنا سلالة عرب
منو الفي الاساس
قال انحنا العرب
وهم استباح الاماني المريضه
خطابة وقريضة
وصارت فريضه
نقيف بي سودانا
ونقول العرب
عجب يا زمان !
يا زمان العجب !!
بنفخر باردأ بشر في زمانّا
حقيقة وبقوله
دي قلة ادب
ورغم صرامة وجوهنا الحزينة
ورغم الصفات المؤصلة فينا
كل ما تقال كان بحس بي الغبينه
ندقدق صدورنا
ونبرم الشنب
ومن غير مساس
بحق القبيله تكوس الاساس
تشوف ليها راس
جميعنا اتلصقنا بعم النبي
وكل فرقة مرقت
بشدرة نسب
برغم الطبايع البتظهر علينا
تقول فينا جينتا اساسا اب لهب
وبقول لي البيابا
الكلام من اهلنا
بحق من بحكمو
خلقنا وجعلنا
شوايقه وحلنقه
شلكنا وجعلنا
دناقله وشنابله
مرسنا وكولنا
وناس فيتريته وناس الرطب
حمر او حوازمه
فور في القضارف
قبط في المسالمه
ملايكه ومجارمه
نوبه وحلب
بقول اعترافا
مؤسس مؤصل عبر الحقب
حقيقه بتكون
اذا في فهمنا
العبوديه لون
بقول امي خادم
وابوي اصلو عب
بحتنا التراب
من بعانخي ورجعنا
حملنا الحضارة ومرقنا الدهب
فتحنا البلاد البعيده وقريبه
كتبنا القصايد عشان الحبيبه
وخضنا الحروب !
حتي من غير سبب !!
رسمنا الدروب لي الزمان الجديد
بنينا المداين صهرنا الحديد
وجونا العرب
عرضنا بسيوفنا
في حفلة طرب
اهلي وولادي
وعزة سوادي
وطينة بلادي
مرقنا السهام
لي العيون العجب
متنا وحيينا
عشنا وبقينا
جد حب خادم وعب بت عرب
طلعنا الخليط اب رطانتا تعب
طلعنا السواد اب كلاما كعب
تشوف صر وجوهنا
تقابلك عيون
تشوف الف لهجه
تشوف الف لون
حمارنا في سوادنا
سودانا بيكون
طبعنا بيحير
طبع ذو فنون
صلاتنا بتقد السما
حين نصلي !!
ومرات نوري
الليالي المجون !!!

صلابه وصرامه
مروءه وشهامه
بخيلنا بيشد
لي الضيوف الكرامه
ولمن نلاقي اللئيم
في طريقنا
نوري اللئيم
كيف تكون اللآمه
نوري السفيه
ايه بيعني الادب
شمالنا وجنوبنا شرقنا وغربنا
قساوة ظروفنا صعوبة دربنا
رضانا وغضبنا سلامنا وحربنا
طلعنا المثال
لو عقلنا وهدينا
مسكنا المعاول
حفرنا وبنينا
نسينا الافارقه ونسينا العرب
حدودنا بتفوت
غادي حد النجوم
نيلنا بيدفق
خدارنا بيقوم
نحس بالأمان المفارق طريقنا
نلملم ولادنا
ونرقد ننوم
لاني محل ماالف دنية الله
اغوص في سهوله
واحدد جباله
محل ما اكون
او تكون حالتي حاله
ومحل ما بشر جات
تكوس الاصاله
تأشر قصاد اتجاهي ومكاني
دا زول سوداني
دا زول سوداني
خليط الافارقه
وهجين العرب


 
 توقيع : عثمان أحمد سعيد



رد مع اقتباس
قديم 01-08-2010, 09:55 PM   #2
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 حمامات البلد



حمامات البلد

حمامات البلد صمتن
نسنلك حتي تهديلن
لقيتن في الصباح ناعسات
سيبك حين يحين ليلن
قمارينا التقوقى زمان
بقيت وحدى البناديلن
وكت وقفن يعاينن لي
حسيت داير اشكيلن
قبضت زمام زمام صبري
وشديت حيلى من حيلن
و قت انا يا اموت واقف
ويا من حبى اهديلن
إذا ضاقت مسالك البوح
مسارب روحى بتشيلن
بلبدن إن بقنلي جروح
تسيل دمعاتي ما يسيلن
بدسهن الصباح فى الضو
وبالليل ياني قنديلن
وكان غلبن دمع بى الشوق
بمد انا قلبى منديلن


18/1/2006


 
 توقيع : عثمان أحمد سعيد



رد مع اقتباس
قديم 01-08-2010, 10:39 PM   #3
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 مالو القلم



مالو القلم بقى زاتو العن مننا
نقعد عشان نكتب حبيب
يكتب لنا الهم والضنى
تارى الشقا المشرور هموم
إتمد فى الاقلام عنا
عبقر خلاص جن الفرح
تاه منو فضّل جننا
من جنو يطلع ليك كلام
زى التقول ما مننا
وراجيانى صرخ بى هواك
وارسم دروبك بي الغنا
اوصف لك الندى والمطر
واقول عليك كل المنى
يا بت احبك كيف تكون
وانا زاتى ما ظنيت انا

ولقينا ليك وجع الغنا
اتفتقت فيهو اللغة
واتحرقت بؤر الكلام
اتصارعت فيه الحروف
بين تنسكب مقطع نشيد
او تنكسر تعظيم سلام
او تكشف السر عن حزن
داسنو فى نص القلوب
لابسنو فى العينين وسام

احلام تمام
وايدين مجبصة بى الفقر
اوجاع تهز غيم الاسى
ينزل مطر بى طعم مر
لا ضحكة الزول النريدو
تقودنا لى زمنا كتر
لا بسمتو
لا لمسة ايدو
ترش محل خاطرا يسر
يا قلبى كيف طعم الهوى
ما دام رغيف الناس جمر ؟؟؟؟



الجمعة 4/1/2002


 
 توقيع : عثمان أحمد سعيد



رد مع اقتباس
قديم 01-08-2010, 10:40 PM   #4
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 فتِش



فتِّش


( الى الولد الشفيف الرهيق الواثق ادم جميدان )
فتش في مكامن الوجعة
وادخل في دروب الليل
كوس ليها العمر كله
سويلا النجيمات نيل
ولملم دمعة الفقرا
وكب دمعاتن ادلقا سيل
وسافر من بلاد لي بلاد
ولاقي عباد
ناس في الفسق متداريين
وناس لابسين تياب زهاد
وصنقر في السحاب عاين
شنو البحصل تلوت الليل
تلقي الجنة
تالى الويل
وفتش في الخلوق فتيش
لاتفرز عضم لاراس
لاتفرز لحم لالباس
كوس في الدنيا زي ما تكوس
بس ما تكوس عيون الناس
ما الناس صبحو عاد ما ناس
راكبُن الجن الخناس
لابيحلو ليك اشكال
لافيهم بتلقي دليل
كوس ابحت جروف النيل
وافرد دهشتك منديل
صر فيها الوجع كوراك
يا أبو مروه
يا أبو مروه
صدقني بتنوني براك
وتشحد ربك السواك
تكون الدنيا ما الدنيا
تسافر في سما الأفلاك
محل لا ينكسر ضهرك
لا في يوم تفقد الحيل
دا زمناً لا بشوف قمره
لا ولاداً بطاردو شليل
دا زمن اسبيس
ميكي الفار وتوم دا كديس
وضم قلمك علي إيدك
كلمتك ياها ست سيدك
وجع ريدك
وتنهيدك
وزولتك فى مسارب الضي
تمد طرف الدلال آهة
يرف قلبك مع الذكرى
وروحك تبقي تواهة
وزلتك لابده في زاتك
تجد ضحكاتا ضحكاتك
وصوت أنّاتا أناتك
يا الضارب الزمن شلوت
ورافع رايه مخلاتك
ومخلاتك
معبيه بالهوى الفاضي
قبال الشمس تطلع
ترجع و انت ما راضي
لاصدق الحبيب وعدو
لا السقف الهناك آواك
روحك عالقة فوق النور
وقلبك ما بقيف يرجاك
ضم قلمك على صدرك
وأكتب ألف ألف كتاب
نادى الحرف من بطن أمو
ولِّعُو لمبة جنب الباب
أمِسْكو عصاية حارب بيها
آلاف من وحوش وكلاب
واضغطو حين يكورك الروب
واعصرو مرة سوى شراب
شنو الحرف إن لفح توب بت
وباكا الليل كساه عزاب
لاحسّ بوجعه الناس
لاشاف غير عيونا مآب
ضم قلمك على قلبك
على إيدك على صدرك
أرسم بيهو طوريه
شيله وقوم على حفرك
يا توصل نهاية الميس
يا تتمد في قبرك
إنكت إنت في الواطة
سوط لىْ جِنّها سواطة
لبِّسا قرمصيص وجعا
وأكسيها الاسى رحاطه
وسن قلمك مسن السيف
أغرسو نص وليداتا
وحاول بين شديرة الهم
تاوق لى بسيماتا
تلاقى البسمه ما كضبه
حقيقة وسامقة نخلاتا
تلاقى البسمة فى ولدا
بيضحك من نزيف روحو
بضارى الآهه في رسمو
ريشتو مغمسه جروحو
لا استسلم ولا سلم
ولاوجعاتو ديك زحّن
عنيد زي صخرة بتناطح
وقرن الوجعة إتمحن
ولد كالنسمة كالعصفور
ولد من السما السابع
وديع وصبور
ولد مبرور
طالع من سما دارفور
صافي كما مياه قولو
مغمس في الشجن مجرور
شي من مدني
وشي من كسلا
وفي الشاقيه غاسل رجلو من بابور
اكتب ليه يامحمد
دا زول ما بلحقو الهبِّيش
ولا بلقوه بي الفتِّيش
ولا بطلع بدون ميعاد
لابحِيبَنُّو طلق الديش
عاين في قيم راحت
بتلقي هناك
ممدد في مساند ريش
طبايعو مضرضرات كالعيش
فتش ليه يامحمد
فتش انت لي متلو
اقصدو عديل
واكتب الف الف قصيد
لوحك أبدا بي الترتيل
ما تكوس ليها انت براها
ان فتر الزمن تلقاها
لكن متلو مافي مثيل
هي ان فَتَّشْتَلَا الموجات
هو فَتِّشْلُو العتامير ديل
هي ان سكنت ضلع ورده
هو بين الشوك دمومو تسيل
وفتِّش ليها يا محمد
قوم كوس ليه يامحمد
الإتنين بشِدُّو الحيل


السبت/23/مارس/2002


 
 توقيع : عثمان أحمد سعيد



رد مع اقتباس
قديم 01-08-2010, 10:43 PM   #5
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 زهــــاء الطاهـــر



مرقت عيونك
إلى أخي

صديق السنوات الزاهية والأيام النضرة

زهــــاء الطاهـــر




مرقت عيونك
من ضفاف الموج
ومن أوسط براريق السنا الوسطانى
تخلع وشى الضلمة
وتشخبط في كراريس المجانين
البيملو الورقة بى النضم الفلاني
يات من يشوفن
يا دخل في روحو
دسدس نفسو من نفسو
ودسّاك في تضاريس المعاني
ويا نتف نجمة وشردبها
بين مفازات المواجع
ساقا كونا ً ناسو تانى


مرقت عيونك
فتحت شبابيك التأرجح
بين سفالات عصرنا
وبين حلم ساعة ينكتب
تطلع أغاني
واتسركن الليل
القبُل ما يشوف عيونك
كان مكرفس جتّتُو
وراميلى ضلُّو
وامتداد الضل على رملة زماني
وحتى الغباش
البين مفارقة الفجُر
ومقابلة وش الصباح
لاك برعم الورد المساهر
وطرّز الضو بى الأماني


مرقت عيونك
إتجابدو الناس البشاير
إتشكلو في تورتة فرح
إتداقَقُو
بى سوط مسورو الذكريات
الكان تخلِّى الروح تعانى
تاريخ قديم
مرسوم على وش الجميع
أحلامُن أكبر من تساسِق
بين دي فاتت ولّا ديك
يا دوبه عاطر زيفة جاني
اتجرَّحُو الناس
البسمُّوهم صعاليك الحروف
عشّاق تراب هذا التراب
حُلّاب مواجع الناس معاني

مرقت عيونك
من حسابات في و مافى
دخلت مسارات إنكسار الضو
على الحلم الزماني
خشَّن مغاليق المجاهيل التودِّر
تنعدم فيها الرؤى
واللهفة
والشوق والتداني
وبراكا في جوف لحظتك
شِن دار تَسَوْ
ولِع كليماتك رجا
لي كل من قابلتو في درب ألعصاه
لو كان سكرجى ولّا زاني
وارسم
من الضحكة البِنَعْرِف مكتلَة
تعريشة تحتها كل من سبَّب أذاك
بى غنجو
أو بى صوتو
أو بى لحن حاني
تعريشة
تحتها كل ميارم الداجو
بت تمبكتو
أنواع الفواطم
و البِنيَّات الجُداد
من سلمى
لامِن عاد تصل حدُّود أماني
لِم فيها ناسك
من خليل الزرعى
ود السايطة
سيد الرايحة
جَرْجِر عود عشوشة
و خلِّى جــَدْية تنضِّم الوتر
البطلِّع حس غناك
الكانى مانى
يا زاهي
تعال زورنى باللهِ
آخر متاريس الغنا
الغامسِنًّو في نيل الأدب
قِل الأدب
وموَسِّدِنُّو الليل
يسلِّم نجمو لى نجمات
يرقِّصَن الأغاني
وين يا حبايب
دي الفراديس المكوثرة دهشة
ترسم ( جــــالا ) ألوانه
وتلبِّس ناسا
زرعي و برتكانى


دخلت عيونك
بين ميارمك
وبين جياد ليلى و مراثيك
خشُّو داراًً
في المكان اللامكانى
يا زاهي آه
من آه خليل
لى كل آهة
تشِق صدُر زولاً بعاني
يا زاهي آه
تانى لا المشية الوديعة
لا حياءك
لا النهارات التغيِّم في المداين
تهدى عالم كردفانى
24/5/2004



 
 توقيع : عثمان أحمد سعيد



رد مع اقتباس
قديم 01-08-2010, 10:44 PM   #6
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 بستان هواك



بستان هواك
وانا ماشي في بستان هواك

وردات هواي فاضن عبير

ناسجين طيوفو من ابتسامتك

ومن نتح قلبي الاسير

مديت ضفاير الشوق عليك

احلام صباح نديان مطير

ضحك النجم من ضحكته

وقمر الصباح قرّب يطير

ولو قلت ليك

كان القمر

غيرّ مسارو حتتو

والغيم سكن وادي الجفاف

بلل سهوله وحلتو

واتجمعت كل النجوم

في خدو صارن دمعتو

حزنا علي قلبي الجريح

من قولو كيف من أنّتُو

ياريده غابت كم عمر

من وين لمع برقك هنا

قايلانا زي بستان زمان

نضحك بنفسج وسوسنه

يا ما الزمان بعدك ودر

شربنا كاسات الضني

ويا إنتي ما حلمي الزمان

او التقول انا ما انا

الخميس 13/8/1998


 
 توقيع : عثمان أحمد سعيد



رد مع اقتباس
قديم 01-08-2010, 10:46 PM   #7
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 البسيمات البرارن



البسيمات البرارن

قسميهن ضحكه ضحكه

قسمي الموج شكل ورده

رشرشيه في كل سكه

وايِّ سكه خلاف طريقك ،، ما طريقي

وايِّ عاشق نارو واقده

تلقي ماخده من حريقي

وكل لمعه برق تدخل

غيمه ضوها من بريقي

وتلقي انك حلم آتي

وعد ممدود في الليالي

فيه تحلم امنياتي

وانك انتي

من بدايتك لي نهايتك كل زاتى

5/1/2002


 
 توقيع : عثمان أحمد سعيد



رد مع اقتباس
قديم 01-08-2010, 10:48 PM   #8
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 ياناسي







لوكنت مفتكر الهوى ،، كان اوحشك طول البعاد

او كنت رسَّلت القمر ،، يسبق خُطاكا على المعاد

كم ليلة مرت وكم زمن ،، ما طوَّفت ذكرانا بيك

زى التقول ما بينا شِى ،، لا حتى يوم ناديت عليك

يا ناسى ايام الهوى ،، وحارق قليب المشتهيك

جرَّحْت عمرك بى جفاك ،، تاهت عليك خطوات مشيك

انا قلبىمسكون بى هواك ،، متمدِّى فى ليل السهر

دايماً يلاعب فى النجوم ،، ينزل مع الغيمات مطر

قلبى المولَّه بيك سنين ،، راسمك على خد القمر

اصبح كأنَّك ماكا فى ،، وبى كل هوى السمحين كفر

بيناتنا كان قصة هوى ،، بس سيل غرورك شاله فات

ايام من الزمن الشفيف ،، كانت امانى وامنيات

لا حلمى بيك فرهد ورود ،، لا شوقى خدَّر سنبلات

هسَّع بتسأل عنِّى ليه ،، بعد الهوى الفى قلبى مات
الخميس 25/5/2000





 
 توقيع : عثمان أحمد سعيد



رد مع اقتباس
قديم 01-08-2010, 11:11 PM   #9
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 ضد النيل



ضــد النيــــل

من كٌتر الغباين فيك
سقيت وجعاتك البلدات
شرِّيت حزنك المدسوس
دلقتو على البلد موجات
بعد ما كُتَّ شاطئ و موج
إتقطَّعت لى شهقات
يسمُّوك نيل
نسمِّيك ويل
فيك ما شفنا غير ويلات
لاك بَحَراً بسافرو على
لا عندك جمال ضفَّات
لا زهراً طرح جرفك
لا فيك رقَّصن الحلوات
نغنِّيك شن نغنيلك
شنو الصارِّيه فينا صفات
شنو القدمتو لينا حلو
عشان نطراك في الغنيات
نسيمك
ما بنَسَمِّي عليل
عشان آخرتو كتَّاحات
ومويتك ماها عذب فرات
مويتك طين وكوم حشرات
وما تسمع غُنَا الكذبة
متين رفع الكذب رايات
وآه يا نيل آه يا نيل
ديك سحب الخريف جايات
شِد حزنك علي صدرك
أدٌشرو مع الصباحيات
غرِّق فيه ماضي أسيف
خدر بيهُ كم وردات
دا حزنك غرق الواطة
طلع نبت الجروف دمعات
دعم حرف الكلام إتمد
عمه تطرزا الآهات
كيفِن عليك من الجنة
تجيب من الجحيم زفرات
مشتِّح فينا رجلينك
راقد ملط في الخلوات
مغطس واحده في فكتو
وشانق التانية في الهضبات
ورافع إصبعك فينا
معلق فيه حلماً آت
كأَنك دار تقول لينا
طز في شعب هاجر ومات
شعب احلامو بالكيمان
عمايلو جبال صفر شاهقات
لسانو ينَقِّط الطوريه
يحرت ليك كم جدعات
ينز عرقاً كأَنُّو السيل
تضوق تلقي العرق فارغات
تمد ايديك علي المنجل
تلاقي سنونو منكسرات
دا حالنا معاك مما قمنا
كيف بتغير الحالات
ام يا نيل دى ما ارضك
أم عندك
دي ما أرضك
أم عندك كمان ناسات

الاثنين
3/8/2000م


 
 توقيع : عثمان أحمد سعيد



رد مع اقتباس
قديم 01-08-2010, 11:19 PM   #10
:: VIP ::


الصورة الرمزية عثمان أحمد سعيد
عثمان أحمد سعيد غير متواجد حالياً

بيانات اضافيه [ + ]
 رقم العضوية : 1449
 تاريخ التسجيل :  Mar 2010
 أخر زيارة : 27-12-2012 (09:12 PM)
 المشاركات : 116 [ + ]
 التقييم :  10
 الدولهـ
Sudan
 الجنس ~
Female
لوني المفضل : Coral
1 حبل الصبُر



حبل الصبر


لى الزمن الندى وتريان ،،
مراكب الشوق تعدِّيلَك

ولى قامات نخيلنا الفوق
تميراتٍ تناجيلك
ونحنا نقابض الغيمات
نغازل فى مواويلك
يمتد الزمن ساحات
مسافات ما بتودِّيلك
يا عُمرى الشَّبَك فى الريد
يا حلمى البناديلك
انا وحبل الصبر والليل
على العتبات نغنِّيلَك
طرَّزنا السهر غنوة
نجوم الليل مناديلك
علَّمنا القمر يرتاح
على صفحة مياه نيلك
خلينا الغمام يرتاح
يبارى سماك
ويحكيلك
عن طل الندى الجُوَّاى
وعن زهرات أقاويلك
وعن حلماً سرح نديان
يجَمِّع شوقو يحكيلك
لا أنا لا حبال صبرى
لا الليل البغنِّيلَك
عرفنا مدى هواك وسناك
ولا مرجع اناجيلك
لا عِرف الزمن معناك
لا الحرِف البهاتيلك
يا الوطن المسقَّى دموع
وبى دمعك نشابيلك
مِدخِّلنا فى قدود النار
مودِّرنا فى أحابيلك
دروبك توَّهت من تاه
وساستك فى أباطيلك
نجومك هاجرت مَنَّك
وقمراتك أبن ليلك
فيا نادوسنا ما عارفين
حكايتك وكيف احاويلك
لا لمِّيت أُصول عربك
لا دم الزنوج هيلك
فقوم يا شعبنا المسكين
اسرج شِد ضهور خيلك
عشان تلقى الفَجر قدَّام
وتحصد خير قناديلك
إذا فضَّلت ترجا النيل
وميكائيل يكيل كيلكُ
لا بنزل مطر يسقيك
لا ارضاً تشيل شيلك
فانفض كسلك اللاميك
وشمِّر عن سراويلك
واحفر طينك المعجون
طميهُ بسلسبيل جيلك
وإلّا فانتظر موتك
وارجا طيور أبابيلك


 
 توقيع : عثمان أحمد سعيد



رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع










الساعة الآن 08:07 PM.
Powered by mobdioun.org® , Developer by ALRAYEIS
حقوق النشر محفوظة لـ :: منتديات مبدعون :: والآراء والمقالات المنشـورة تعبير خاص بكاتبها

a.d - i.s.s.w